نداء للمؤثرين.. الشهرة مسؤولية والتأثير فعل

بقلم :ساره احمد

أنا عندي نداء لكل Influencer، وكل صانع محتوى، وكل فنان أو شخصية عامة عندها جمهور وتأثير:

خصصوا جزء من وقتكم.. من الريلز، والـLive، والمحتوى اليومي، لقضايا المجتمع.

مش لازم كل حاجة نقدمها للناس تكون بهدف الترفيه، أو الترند، أو الجدل. إحنا محتاجين كمان نستخدم المساحات دي في طرح أسئلة وقضايا مهمة تمس حياتنا اليومية.

ممكن نتكلم عن البيئة، وعن المخلفات وإزاي نتعامل معاها.

ممكن نتكلم عن المياه وترشيد استهلاكها.

ممكن نتكلم عن المناخ وتأثير التغيرات المناخية على حياتنا.

ممكن نتكلم حتى عن ترشيد الغذاء وتقليل الهدر.

يمكن الموضوعات دي في البداية تبان صعبة أو تقيلة على السوشيال ميديا، وهنا بالضبط بييجي دور المؤثر وصانع المحتوى.

مهمتك مش إنك تعمل محاضرة.. مهمتك إنك تبسط القضية.

قدمها بالطريقة اللي جمهورك يحبها ويفهمها. مرة بشكل ساخر، مرة بشكل درامي، مرة بشكل مؤثر، أو حتى من خلال موقف بسيط من الحياة اليومية.

المهم إن الرسالة توصل.

وأنا هنا مش بتكلم بس عن الـInfluencers. أنا بضم دعوتي كمان لكل فنان وصانع سينما.

مش لازم الاستعانة بالفنان أو المشهور تكون فقط في مهرجان أو فعالية علشان الصورة تبقى حلوة، ونقول إننا مهتمين بالقضية، وبعدها تنتهي الحكاية بانتهاء الفعالية.

الاهتمام الحقيقي بالقضية مش لقطة.. الاهتمام الحقيقي موقف واستمرار وتحرك.

صناع السينما والدراما تحديدًا عندهم قدرة هائلة على تسليط الضوء على قضايا ممكن حملات التوعية التقليدية متوصلهاش بنفس القوة. قصة، شخصية، مشهد، أو حتى لحظة كوميدية ممكن تفتح نقاشًا عند ملايين الناس.

لأن الحقيقة إن التوعية التقليدية لم تعد كافية وحدها.

الجمهور اتغير، وطريقة استقباله للمعلومة اتغيرت، والمنصات الرقمية أصبحت جزءًا أساسيًا من حياته. وبالتالي، لازم طريقة التوعية نفسها تتغير.

وده مش معناه إننا نستغنى عن حملات التوعية التقليدية، بالعكس. لكن محتاجين نكملها بأدوات جديدة، وبأفكار أكثر قربًا من الناس، وبالتعاون مع أصحاب التأثير الحقيقي.

وأنا مؤمنة إن المسؤولية هنا مش مسؤولية جهة واحدة.

وزارة، مؤسسة، شركة، إعلام، مؤثرين، فنانين، صناع محتوى، وصناع سينما ودراما… كل واحد عنده جزء من الصورة.

لما كل طرف يستخدم المساحة اللي عنده، والتأثير اللي يمتلكه، في خدمة قضية حقيقية، وقتها ممكن التوعية تتحول من مجرد كلام بنقوله إلى سلوك بيتغير ومجتمع بيتحرك.

وعلشان كده، دي دعوة مني لكل من يهمه الأمر:

استخدموا تأثيركم.. مش بس علشان الناس تشوفكم، لكن علشان الناس تسمع، تفهم، وتتحرك.

لأن الشهرة وصول..

لكن التأثير مسؤولية.